vo jo ham mein tum mein qaraar thaa tumhein yaad ho ke na yaad ho

vo jo ham mein tum mein qaraar thaa tumhein yaad ho ke na yaad ho

vahii yaanii vaadaa nibaah kaa tumhein yaad ho ke na yaad ho

vo naye gile vo shikaayatein vo maze maze kii hikaayate.n

vo har ek baat pe ruuThanaa tumhein yaad ho ke na yaad ho

koi baat aisii agar huee jo tumhaare jii ko burii lagii

to bayaaN se pahale hii bhuulanaa tumhein yaad ho ke na yaad ho

suno zikr hai kaein saal kaa, koi vaadaa mujh se thaa aap kaa

vo nibaahane kaa to zikr kyaa, tumhein yaad ho ke na yaad ho

kabhii ham mein tum mein bhii chaah thii, kabhii ham se tum se bhii raah thii

kabhii ham bhii tum bhii the aashnaa, tumhein yaad ho ke na yaad ho

hue ittefaaq se gar baham, vo vafaa jataane ko dam-ba-dam

gilaa-e-malaamat-e-arqabaa, tumhein yaad ho ke na yaad ho

vo jo lutf mujh pe the beshtar, vo karam ke haath mere haath par

mujhe sab hain yaad zaraa zaraa, tumhein yaad no ki na yaad ho

kabhii baiThe sab hai.n jo ruu-ba-ruu to ishaaratoon hii se guftaguu

vo bayaan shauq kaa baramalaa tumhein yaad ho ki na yaad ho

vo bigarhanaa vasl kii raat kaa, vo na maananaa kisii baat kaa

vo nahein nahein kii har aan adaa, tumhein yaad ho ki na yaad ho

jise aap ginte the aashnaa jise aap kahate the baavafaa

main vahii hooN "Momin"-e-mubtalaa tumhein yaad ho ke na yaad ho ...!!!